Som utflytta, er det ikkje sjeldan eg tek turen innom HF si nettside om eg skal få ein oppdatering om hendingar i heimtraktene. Skuffande nok er det vekene gjennom i all hovudsak det polisiære, og då i særskild grad UP, som får spalteplass på verdsveven. Er HF sin nettredaksjon ein politiradio?

Tenk deg dette: du ringer heim til slekta i Hardanger og spør om det hadde skjedd noko særskilt i det siste, og svaret du fekk var: – no skal du høyre: ”Mann teken med dårlege piggdekk på Vintertun”, ”kvinne utan bilbelte på Bleie”, ”ungdomar spelte høg musikk i bilen medan dei kjørte rundt på Ragde”, ”eldre dame braut vikepliktsregelen” og ”ingen køyrde for fort på Grimo”.

Sjølv om overskritene over er fiktive, er dei ikkje langt frå sanninga. Eg har ein stikkande mistanke om at det må vere andre, og meir interessante, nyhende å publisera frå Hardanger? Finst det verkeleg ikkje fleire saker kor temaet ikkje er eit lovbrot eller at politet har ein kontroll for å sjå etter lovbrot?

Eg skal ikkje påstå at eg representerer den store gjennomsnittlege HF-nettavislesarbasen, og for alt eg veit ligg det folk rundt om i Hardanger og drøymer om fleire nyhende frå Hardanger Politikammer. Men skulle eg gissa, ville eg trudd at UP-nyhenda knapt var interessante for politiet sjølv.

Eg utfordrer HF med dette til ei veke utan trafikk-kontroll-nytt. For alt ein veit, kanskje ville andre nyhende fått fleire lesarar til å fylgje nettavisa?